دئییرلر: بیر اوْدونچو هر گون مئشه‌یه گئدیب، اوْدون قیریب سونرادا
گتیریب بازاردا ساتاردی. بیر گون کیشی اوْدون قیراندا بیر آیی
قاباغینا چیخیر. آیی اونا دئییر کی:
- من اوْدون قیریب داشیماقدا سنه کؤمک ائده‌جه‌یم.
سن ده عوضینده منه یئمک وئر.
اوْدونچو آیی ایله ایشه ال قوشان گوندن چوخلو اوْدون
گتیریب ساتیب، گذرانی چوخ یاخشی اولموشدو. بیر
گون اوْدونچو آیی‌یه یئمک وئرنده قاییدیر کی:
- آدام کیمی یئیه بیلمیرسن؟ نییه ایت کیمی گَوه‌لَـییرسن؟
آیی دورور آیاغا یولا دوزه‌لیر. اوْدونچو نه قدر چاغیریرسا جواب وئرمیر.
آرادان بیر - ایکی گون گئچیر. بیردن نئجه اولورسا اوْدونچو گینه آیی
ایله راستلاشیر. سوروشور:
- آی آیی سنه نه اولوب؟ نییه منه کؤمک ائیله‌میرسن؟
آیی اوْدونچویا دئییر:
- تئز اول الینده کی بالتا ایله منیم باشیمی یار. یوخسا سنی پارچالارام.
اوْدونچو جانی‌نین قورخوسوندان آیی‌نین باشینی یاریر. آیی باشی‌نین
قانی آخا - آخا دینمزجه چیخیر گئدیر!
اوْدونچو بیر - ایکی آی سونرا آیی ایله راستلاشیر. آیی باشینی
اوْدونچویا گؤستریب سوروشور:
- باخ گؤر یارانین یئری ساغلیب یا گینه قان گلیر؟
اوْدونچو باخیر کی، آیی‌نین باشی لاپ ساغالیب. آرخایینجا قاییدیر کی:
- بۆتۆن ساغالیب. ائله بیل هیچ یاراسی اولماییب. آما من هله ایندی
ده بیلیرم کی، سن نییه باشینی یاردیردین!!
آیی اوْدونچویا دئییر:
- یادینا گلیرمـی سن چؤرک یئینده سینه‌مه سؤز یاراسی ووردون؟
سونرادا من سنین الین‌له اؤزومه بالتا یاراسی ووردوتدوم؟ ایندی
بالتا یاراسی ساغالیب آما او دیل یاراسی ساغالمیر کی، ساغالمیر.
آیی بونو دئییب اوْدونچودان اوزاقلاشیر. بیرده اونون گؤزونه
گؤروشمور.
عزیزیم دیل یاراسی
آغیردیر دیل یاراسی
خنجر دَگسه ساغالار
ساغالماز دیل یاراسی
حاضرلایان: تانسو خیاوی
