راستا کوچه
مشروطه کورپوسوایندی ده وار آت شئیهه سی،
آتلیلارین گور صئیحه سی،
شانلی ائلین حق نفه سی،
اونون هایی، اونون سسی،
بو کوچه ده جینگیلده ییر،
ائل سازیندا دینگیلده ییر،
گویون اوزو پاریلداییر،
گولله سسی شاریلداییر،
" ایلدیریم " ین توپو شاخیر،
سنگره ائل سئل تک آخیر.
بویلان بیر باخ! او ائل گلیر،
ائل دئمیشکن گور سئل گلیر،
آت اوستونده اودور " سردار "،
اودور " باغوان "، اودور "سالار"؛
گونده ن یانمیش اوزو _ گوزو،
پولاددان دیر " سردار " اوزو؛
آرخاسیندا نه انسانلار،
قورخو بیلمز نه اصلانلار،
بونلار پولاد قالادیرلار،
پارلاق تاریخ یارادیرلار.
دئمه بونلار سوووشورلار،
ایتگین لیگه قوووشورلار؛
همان او یول _ اوایز یاشیر،
چونکو شانلی تبریز یاشیر؛
زمان حددین بو ائل آشیر،
" حاللاج " عشقی جوشور _داشیر،
حق سوزو وار اوره گینده،
ائل گوجو وار بیله گینده.
