معنا و ایشله ندیگی ساحه: بو دئییم، شراییطین غیر عادی اولدوغی زامان یاخود
دا " بو آدام تصور اولونان عادی شخص دئییل" آنلامیندا ایشله نیر.
* میثال: ایداره یه جیدی بیر رئیس گلیب، آنجاق سن عادت اوزره هردن بیر نئچه
ساعات ایشدن کسیب، بازارا گئتمک ایستیرسن، دوستلارین سنی دوشوندورمک
ایستیر کی شراییط قاباقکی کیمی دئییل و داها تئز _ تئز ایداره دن چیخماق ممکن
اولمایاجاق. اوندا دئیرلر: بو قره او قره لره بنزه مز!
* شان_ نزولونو دانیشان: تاریخچی دوستوم رحمتلیک "صمد سردارینیا".
ریوایت:
قاجار دؤرونده تبریزده حاژغلامحسین آغا آدلی بیر بؤیوح تاجیر وار ایدی، بو
حاژغلامحسین آغا چوخ حاضیرجواب و میرتجیل بیر آدام ایدی، او زامانین
شرط لرینه گؤره تبریزین اغلب اعیان ائولرینده نؤکر _کولفت ساخلاناردی
بولارین بعضیلری ده ساتین آلما قره قول اولاردی. حاژغلامحسین آغانین دا بیر
قره قولی وار ایدی. آما اکثر قره قوللار ساکیت، قورخاخ و آز دانیشان اولسئیدیلار
، حاژغلامحسین آغانین قولی  اؤز صاحیبیننن اؤرگشدیغی میرتجیللیخ
و حاضیرجوابلیغیینن او بیری قول لاردان سئچیلردی، او صاحیبینین یانینجا
دوشوپ، گئتدیغی مجلیسلرده ایذین آلیپ، اونا _ بونا گؤزل جواپلار وئریر،
مجلیسده کیلری گولدوررمیش.

او قوللار کیمین آنجاغ اربابینین آدینن یعنی "حاژغلامحسین آغانین قره سی"
آدینن آدلانارمیش.
او زامانلار تبریزده بئله بیر مثل دیللره دوشور:
"بو قره او قره لره بنزمز، بو حاژغلامحسین آغانین قره سیدی".
سورالار بو دئییمین ایکینجی جمله سی دیللردن دوشور و فقط "بو قره او قره لره
بنزمز" کیمین، گونوموزه قدر گلیپ، چیخیر