مـاوی دوغـو گـون پـارلادان، نوردان سـاچاق آنـا دیلیم!
ائلده مئشهلیک یارادان، یاشیل یارپاق آنا دیلیم!
یاراشیقسان ائل سسینده، حنجرهنین ذیل سسینده
موغاماتین تئل سسینده، آینا - داراق آنا دیلیم
خیاللاری جانلاندیران، الهامدان غزل آلدیران
آنلام پنجرهسین آچان، یایلاق - یایلاق آنا دیلیم
آنام سندن لای لای قوشد، گونده قوشدو آیدا قوشدو
باشلانیشی بللنمهین، دیلدن قاباق آنا دیلیم!
شؤهرتیمسن، شوکتیمسن، منه اینانج اؤیرهدیبسن
ایگیدلیگ ذیروهلریمده، وولکان قایناق آنا دیلیم!
قوللاریمین گوجو سندن، یوللاریمین دوزو سندن
قان داماری بیلهییمده، قیزیل بایراق آنا دیلیم!
سن، دده قورقود دیلیسن چنلی بئللر نیسگیلیسن
اویات دلیلری، اویات، یاتما تاپداق آنا دیلیم!
ائل هارایی، سئل هارایی، آسلان چنلی بئل هارایی
قوچاقلارین دؤووشونده، داوام - دایاق آنا دیلیم
ائل هاوالان، سئل هاوالان، أرن- باشی خان ساوالان!
قیرآت - دورآتی هایلایاق، چیلپاق چاپاق آنا دیلیم!
شیرین آینا سؤز بولاغی، کهلیک باریشیق اویلاغی
دادلی - طاملی غزلیمده، باللی قایماق آنا دیلیم
مدنییت، فیطرتیمی، وارلیق چکیر شرفیمی
کئچمیشلردن گلهجهیه، آیدین - پارلاق آنا دیلیم