ایستی بیر یای کیمی قارسیزلامیشام!
کؤهنه باغلار کیمی بارسیزلامیشام!
نه وزیرم نه معاون نه وکیل
اودو بیر عؤمر دولارسیزلامیشام!
ساکت ایلشمه‌یین ای مسؤوللار
گؤرمه‌ییرسیز نه شعارسیزلامیشام؟!
تیر آیی کئچدی کؤتکلر آزالیب
منده دانشجو! فشارسیزلامیشام!
یوخدور هئچ مندن اطاعت ائله‌ین
چوبانام سانکی داوارسیزلامیشام!
چون دؤنوب بعضی قارینلار طبیله
او جهتدن بئله تارسیزلامیشام!
شعارا مشتری وار حق سؤزه یوخ
نئچه ایلدیر کی بازارسیزلامیشام!
ائل دئیه‌ر: دیواریمیز آلچاق اولوب
من کؤکوندن‌ده دیوارسیزلامیشام!
بیر قوجا یئتمیشینی صیغه ائدیب
من جوان واختی نیگارسیزلامیشام!
آلتمیش ایلدیر اؤلویم یوخدو پولوم-
وئرمه‌یه قبره مزارسیزلامیشام!
پوللونون قارنینا موزدور کی گئدیر
یوخسولام منده خیارسیزلامیشام!
کیشییم آمما یئر آلماسی کیمی
قورخاراق لاپدا دامارسیزلامیشام!
آدیم «آرش»سه‌ده سینمیشدیر اوخوم
توُرش یوغوردام کی بخارسیزلامیشام!