حامام-حامام ایچینده, خلبیر سامان ایچینده, دوه دللکلیک ائدر, کؤهنه حامام ایچینده. قاریشقا شیللاق آتدی , دوه‌نین قیچی سیندی. حامامچینین تاسی یوْخ, بالتاچینین بالتاسی یوْخ, اوْردا بیر تازی گؤردۆم, اوْنۇن دا خالتاسی یوْخ. گۆنلرین بیر گۆنۆنده, مممد نسیرتینینده. چوْخلۇ شیلاش ییئمیشم, بئله یالان دئممیشم. بیری وار ایدی, بیریوخ ایدی, اللاهدان باشقا هئچ کیم یوْخ ایدی. بیر تاجیر وار ایدی. بۇ تاجیرین ایلیاس آدلی بیر قۇلۇ وار ایدی. تاجیر ایلیاسی اؤز اوْغلۇ کیمی ایستییردی. ایلیاس دا تاجیری اؤز دده‌سی کیمی.بیر گۆن تاجیر الینده اوْلان وار-یوْخ مایاسینی باتیردی. تاجیر چوْخ فیکیرلی-فیکیرلی اوْتورمۇشدۇ. ایلیاس بۇنۇ قۆسسه‌لی گؤرۆب یانینا گلدی, دئدی:- آغا, نه فیکیر ائلییرسن؟ دردینی دی, بلکه چاره ائلدیم.تاجیر گۆلۆب دئدی:-آی ایلیاس, سن بیر قۇل آدامسان, منیم دردیمه نه چاره ائلیه بیلرسن؟ ایلیاس دئدی: آی آغا, سن اؤزۆن بیلیرسن کی, من سنی نه قدر ایستییرم. بلکه ایکیمیز بیر یئرده دردۆوه درمان ائلدیک.تاجیرین چاره‌سی کسیلدی, دئدی:- ایلیاس, من وار-یوْخ مایامی باتیرمیشام. ایندی الیمده بیر قپیکم یوْخدۇ. اوْنۇن فیکرینی ائلییرم کی, ایندی من نه ائلیه‌جه‌یم.ایلیاس دئدی:- آغا, بۇننان هاسان شئی یوْخدۇ, آپار منی سات, همین پۇلۇ الینده مایا ائله!تاجیر گۆلۆب دئدی:- ایلیاس اول, من سنی چوْخ ایستییرم. نئجه سنی آپاریم ساتیم؟ بیرده کی, سنه نه پۇل وئره‌جکلر کی, من اوْنۇ الیمده مایا ائلییم؟ ایلیاس دئدی:- آغا, من قیئمتلی قۇلام. من دۆنیادا اۆچ شئیی یاخشی تانییێرام.آتێ, داش-قاشی, آدامی. اوْدۇ کی, آپار منی بازارا, بئش یۆز تۆمن‌دنن اشاغی ساتما. همین پۇلۇ گتیر, الینده مایا ائله!تاجیر بیر آز فیکیر ائلدی, گؤردۆ باشقا چاره یوْخدۇ. ایلیاسێ قۇل میدانیناآپاردێ. کیم گلیب قییمت سوْرۇشۇردۇ, تاجیر بئش یۆز تۆمن دئییب,اؤزۆ ده اۆچ شئی بیلدییینی خبر وئریردی.بۇ واخت پادشاهین وزیری بۇرادان کئچیردی. بۇ سسی ائشیدیب تاجیرین یانینا گلدی, دئدی:- قۇلۇ نئچه دئییرسن?- بئش یۆز تۆمنه دئییرم. اؤزۆ ده اۆچ شئیی یاخشی تانئییر: آدامی, آتی,داش-قاشی.وزیر دئدی:- سن دلی اوْلمۇسان ندی؟ هئچ پادشاهین بۆتۆن قۇللارێ بئش یۆزتۆمنه دیمز. سن بۇ قۇلۇ بئش یۆز تۆمنه دئییرسن?تاجیر دئدی:- بۇ قۇلۇن قییمتی هله بئش یۆز‌دن ده یۇخاریدێ. کئفین چکیر آل,کئفین چکمیر آلما.

وزیر گئدیب پادشاها اهوالاتی دانیشدی. پادشاه دئدی:- گئت, همین قۇلۇ آل!وزیر بئش یۆز تۆمن گتیریب تاجیره وئردی, ایلیاسی آلدی, گتیریب پادشاهین قۇللارینین ایچینه اؤتۆردۆ.تاجیر ده همین پۇلۇ الینده مایا ائلییب آلیش-وئریشینه باشلادێ.تاجیر آلیش-وئریشینده اوْلسۇن, ایلیاس دا قۇللارین ایچینده اوْلسۇن, سنه کیم‌دن دئییم, بیزیم بۇ شهرین جاوان پادشاهیندان. بیر گۆن پادشاهابیر گؤزل آت گتیردیلر. هامی آتا باخیب به-به دئدی, هئچ کیم بیر ائییبتاپمادێ. بیر‌دن پادشاهین یادینا دۆشدۆ کی. آخێ منیم بیر قۇلۇم وار,آتی چوْخ یاخشێ تانئییر. تئز امر ائلدی ایلیاسی گتیردیلر. پادشاه دئدی:- ایلیاس, بۇ آت نئجه آتدی?ایلیاس باش اییب دئدی:- قیبلئیی-عالم ساغ اوْلسۇن, بۇ آتا هئچ بیر سؤز یوْخدۇ. آت بیرینجی آتدێ.اما بۇنۇن بیر ائیبی وار کی, سۇیا گیرسه یاتار.هامی دئدی:- هئچ ائله شئی اوْلماز.ایلیاس دئدی:- پادشاه ساغ اوْلسۇن, منیم دؤولتیم یوْخدۇ, آنجاق باشیمی گیروْوقوْیارام. آتی سالاق سۇیا, اگر یاتماسا منیم بوْینۇمۇ وۇرۇن!بلی, آتی میندیلر, سۇیا وۇردۇلار. آت سۇیا گیرن کیمی یاتدێ. هامی مئتتل قالدێ.پادشاه ایلیاسدان سوْرۇشدۇ:- ایلیاس, بۇ آت نئیه سۇیا گیرن کیمی یاتدێ?ایلیاس دئدی:- پادشاه ساغ اوْلسۇن, بۇ آتا جامیش سۆدۆ وئریبلر, اوْدۇ کی, جامیش کیمی سۇیا گیرن کیمی یاتدێ.پادشاه ایلیاسین بۇ سؤزۆنۆ یوْخلاماق اۆچۆن آتی ساتاندان سوْرۇشدۇ:- سن بۇ آتا جامیش سۆدۆ وئرمیسن؟ آت ساتان باش ائیب دئدی:- پادشاه ساغ اوْلسۇن, بۇ آت آنادان اوْلاندان سوْنرا آناسی اؤلدۆ, من ده اوْنۇ جامیشیمیزا عمیزدیردیم.پادشاهین ایلیاسدان چوْخ-چوْخ خوْشۇ گلدی, دئدی:- بۇ آتی آلین, ایلخییا قاتین! چاپیشمادا لازیم اوْلار.اؤزۆ ده امر ائلدی کی, بۇندان سوْنرا من یئین خؤرک‌دن ایلیاسا داوئرین!بلی, ایلیاس هر گۆن پادشاه یئین خؤرک‌دن یئییردی. بۇنلار بۇرادایئمکده اوْلسۇنلار, سنه کیم‌دن دئییم بیزیم پادشاهین قوْناقلاریندان.بیر نئچه شهرلرین پادشاهلارێ بیزیم پادشاها قوْناق گلمیشدیلر.بیر نفر ده پادشاها یۇمۇرتا بوْیدا آلماز گتیرمیشدی. هامی آلمازاباخیب به-به ائلییب دئییردی: بۇ آلمازین هئچ قییمتی یوْخدۇ. بۇقییمتده شئی اوْلا بیلمز.بیر‌دن پادشاهین یادینا دۆشدۆ کی, آخی منیم ایلیاس آدیندا قۇلۇم وار, داش-قاشی یاخشی تانئییر. تئز امر ائیله‌دی ایلیاسی چاغیرتدیردی. ایلیاس گلدی باش ایدی, دایاندێ.پادشاه دئدی:- ایلیاس, اوْغۇل, بۇ آلمازا قییمت قوْی!ایلیاس آلمازێ آلدێ الینه, بیر اوْ طرفینه باخدێ, بیر بۇ طرفینه باخدێ, دئدی:- پادشاه ساغ اوْلسۇن, بۇ آلماز اوْتۇز تۆمن‌دن یۇخارێ دئیمز, چۆنکی بۇنۇن اۆزۆ آلمازدێ, ایچی توْرپاقدێ.هامی دئدی:- هئچ ائله شئی اوْلا بیلمز.ایلیاس دئدی:- پادشاه ساغ اوْلسۇن, امر ائلیین آلمازێ سیندیرسینلار, ایچین‌دن توْرپاقچیخماسا بوْینۇمۇ وۇردۇرۇن.بلی, پادشاه امر ائلدی, آلمازی سیندیردیلار. آلماز سینان کیمی ایچین‌دن توْرپاق تؤکۆلدۆ. همین آلمازا قییمت قوْیانلار کی, دئییردیلر بۇآلمازین قییمتی یوْخدۇ, هامی اۇتاندێ, باشینی آشاغی سالدی. پادشاه فرحلندیکی, بئله بیر قۇلۇ وار. قوْناقلارین یانیندا قوْلتۇغۇ شیشدی. بلی, پادشاه امر ائلدی کی, بۇندان سوْنرا ایلیاس منیم اؤزۆمله چؤرک یئیه‌جک.بلی, بۇ گۆن‌دن ایلیاسنان پادشاه همیشه بیر یئرده چؤرک یئییردیلر.بۇنلار بۇردا یئمکده اوْلسۇن, ایچمکده اوْلسۇن, سنه کیم‌دن دئییم,بۇ شهرده گؤزللیکده میثلی-برابری اوْلمایان بیر قیز واردێ. بۇ قیزینگؤزللییی بۆتۆن شهرده مشهۇردۇ. اما بۇ قیزێ هئچ کیم گؤرممیشدی,آنجاق آدینێ ائشیتمیشدی. بیر گۆن پادشاه فیکیرلشدی کی, بیر اؤزۆنۆ بۇقیزین یانینا وئرسین. چوْخ فیکیرلشدی, آخیردا بئله تاپدێ کی, امر ائلسین هئچکیم شهرده چوله چیخماسین, اؤزۆ خلوتجه قیزین یانینا گئتسین. بلی, بیر گۆن پادشاه امر ائلدی کی, آخشام ساعت سککیز‌دن سوْنرا بیر آدام ائشیکده قالماسین,بیر آدامین حاقۇشقالارێ آچیق اوْلماسین. امرینه تابع اوْلمایانلارین باشینی بدنین دن آییراجام.بلی, ائله کی, آخشام سککیز اوْلدۇ, ممه یئین‌دن پپه یئینه کی هامیسی قوْرخۇدان گیزلندی. ائله کی, بیر آز دا کئچدی, پادشاه یاواش-یاواش ائودن چیخیب همین گؤزلگیله طرف گئتمه‌یه باشلادێ. بلی, پادشاه گلیب قیزین قاپیسینی دؤیدۆ, قۇللۇقچۇ گلدی.پادشاه دئدی:- گئت, خانیما دی کی, پادشاه گلیب.قۇللۇقچۇ گلیب خانیما دئدی.خانیم دئدی:- گئت, پادشاها دئ کی, بیر اینییم وار, نه آریقدێ, نه کؤک, اؤلدۆرسن نه قدر پییی چیخار?قۇللۇقچۇ گلیب خانیمین دئدییینی پادشاها دئدی.پادشاه بیر آز فیکیرلشدی, آخیردا دئدی:- گئت, خانیما دئ کی, دؤرد پۇد.قۇللۇقچۇ گئدیب خانیما دئدی.خانیم دئدی:- گئت, دئنن خوْش گلدی, گئده بیلر.ائله پادشاه ایستییردی قاییتسین, گؤردۆ کی, بیر قارالتی گلیر. اؤز-اؤزۆنه دئدی: بۇ کیمدی منیم امریم‌دن چیخیب شهرده گزیر. یاخشی, من صاباح آتاسینی یاندیرارام, قوْی یاخینلاشسین گؤرۆم کیمدی.قارالتی یاخینلاشدێ. پادشاه گؤردۆ کی, اؤز وزیریدیر. تئز گیزلندی اوْرادا اوْلان آغاجلارین دالیندا. دئدی, قوْی گؤرۆم وزیر نه قاییراجاق.وزیر پادشاهی گؤرمۆردۆ, اما پادشاه اوْنۇ گؤرۆردۆ. وزیر قیزین قاپیسینایئتیشدی, قاپینی دؤیدۆ, قۇللۇقچۇ گلدی, وزیر دئدی:- گئت, خانیما دی کی, وزیر گلیب.قۇللۇقچۇ گئتدی خانیما دئدی... قاییدیب گلدی کی:- خانیم دئییر کی, بیر اینییم وار, نه آریقدێ, نه کؤک, اؤلدۆرسم نه قدر پییی چیخار?وزیر فیکیرلشدی نه دئسین. نئچه پۇد دئسین. آخیردا دئدی:- یئددی پۇد.قۇللۇقچۇ گئدیب خانیما خبر وئردی, گلیب دئدی:- خانیم دئییر کی, گئده بیلر, خوْش گلدی.وزیر ایستییردی قاییتسین, بیر ده گؤردۆ کی, آها بۇدۇ, بیر قارالتی گلیر.اؤز-اؤزۆنه دئدی: اده, بۇ کیمدی ائشییه چیخیب. سحر پادشاها دئیه‌جه‌یمبۇنۇن باشینی بدنین‌دن آییرسین. تئز آغاجلارین دالیسینا گیردی کی, گیزلنسین,گؤردۆ پادشاه دا بۇرادادیر. وزیر ایسته‌دی سس ائلسین, پادشاه دئدی:- دینمه, گؤرک بۇ گلن کیمدی. گؤرک بۇ نه دئیه‌جک.بۇنلار بۇرادا میسدیلار. قارالتی یاخینلاشدی, گؤردۆلر کی, بۇ گلن ایلیاسدی. ایلیاس قیزین قاپیسینی دؤیدۆ, قۇللۇقچۇ گلدی, ایلیاس دئدی:- گئت, خانیما دی کی, پادشاهین قۇلۇ ایلیاس گلیب.قۇللۇقچۇ گئدیب خانیما خبر وئردی, گلیب ایلیاسا دئدی:- خانیم دئییر کی, بیر اینییم وار, نه آریقدی, نه کؤک; اؤلدۆرسم نه قدر پییی چیخار?پادشاهنان وزیر دئدیلر, دایان گؤرک ایندی بۇ نه دئیه‌جک.ایلیاس دئدی:- گئت, خانیما دی کی, قبۇلدۇ.پادشاهنان وزیر لاپ مئتتل قالدیلار, دئدیلر نه اوْلسۇن کی, بۇنۇ بیزده دئیردیک ده.بلی, قۇللۇقچۇ گلیب قاپینی آچدێ. ایلیاس ایچری گیردی. پادشاهنان وزیرایشی بئله گؤرۆب تئز بیر تهر اؤزلرینی قیزین باغچاسینا سالدیلار, آغاجلارین آلتیندا گیزلندیلر. گؤردۆلر کی, ایلیاس گلیب ائیواندا ایلشیب.بلی, قۇللۇقچۇ الینده بیر پوْدنوْس, اۆستۆنده آغ اؤرتۆک, گتیریب ایلیاسین قاباغینا قوْیدۇ. ایلیاس پوْدنوْسدان اؤرتۆیۆ گؤتۆردۆ, گؤردۆ کی, پوْدنوْسدابیر قایچێ, بیر واراق کاغیذ, بیر قۇران, بیر توْپ ایینه, بیر ده بیر نار وار.پادشاهنان وزیر دئدیلر, هله قوْیاق کی بیز ده دئمیشیک “قبۇلدۇ”,یاخشی, بس بۇ نه اوْلسۇن. نار, قۇران, ایینه, قایچێ, ایندی کی, بۇ سیرری بیلمه‌یه‌جکدیک.قوْی گؤرک ایلیاس نئیله‌یه‌جک.ایلیاس ایینه‌لری گؤتۆرۆب هامیسینی بیر-بیر نارین اۆستۆنه تاخدێ. سوْنراکاغیذێ گؤتۆرۆب قایچێ ایله جیققیلی-جیققیلی دوْغرادێ. سوْنرا قۇرانی اؤپۆب یئره قوْیدۇ. پادشاهلا وزیر بیر-بیرینه دئدیلر:- یاخشی, بۇ نه اوْلسۇن ؟بۇ حالدا قۇللۇقچۇ گلدی, پوْدنوْسۇ آپاردێ. بلی, ائله کی, قۇللۇقچۇپوْدنوْسۇ آپاردێ, خانیم ائیوانا گلدی. قوْلۇنۇ ایلیاسین قوْلۇنا سالدێ.خانیم نه خانیم... آیا, گۆنه دئییر سن چیخما, من چیخاجئیام. آدام دئییر یئمه‌ییم, ایچمه‌ییم, بۇ خانیمین خطتی-خالینا, گۆل جامالینا تاماشاائلییم. پادشاهلا وزیرین آغزینین سۇیۇ آخیردێ. خانیملا ایلیاس اؤپۆشدۆلر,گؤرۆشدۆلر, سوْنرا گیردیلر ائوه. وزیرله پادشاهین آز قالیردێ پاخیللیقدان باغیرلارێ چاتلاسین.بلی, پادشاهگیل گؤردۆلر کی, آز قالیب صۆبح آچیلسین, تئز دۇرۇب ائولرینه گئتدیلر.ایلیاس سحر چوْخ بیواخت ائوه گلدی. پادشاه دئدی:- ایلیاس, گئجه هارادایدین?ایلیاس دئدی:- پادشاه ساغ اوْلسۇن, منی سنه ساتان تاجیرین آناسینی من اؤزۆمه آناکیمی بیلردیم. اوْ دا منی چوْخ ایستییردی. اوْ اؤلۆبدۆ, گئتمیشدیم اوْنۇن قبری‌نین اۆستۆنه. قبرین اۆستۆنده آغلادیم, آغلادیم, یۇخۇ تۇتدۇ, قالدیم قبرین اۆستۆنده. بیر ده گؤردۆم کی, سحردی.پادشاه بیلیردی کی, گئجه ایلیاس هارادایدێ, چۆنکی اؤزۆ اؤز گؤزۆ ایله گؤرمۆشدۆر. اوْدۇ کی, بیلدی کی, ایلیاس یالان دئییر, یئنه دئدی:- ایلیاس, دۆزۆن دی, گئجه هارادایدین?ایلیاس دئدی:- پادشاه ساغ اوْلسۇن, یۇخۇ تۇتمۇشدۇ, قالمێشدیم قبرین اۆستۆنده.پادشاه حیرصلندی, دئدی:- ایلیاس, دۆزۆنۆ دی گئجه هارادایدین? یوْخسا باشۇوۇ بدنین‌دن آییرارام.ایلیاس یئنه دئدی:- پادشاه ساغ اوْلسۇن, یۇخۇ تۇتمۇشدۇ, قالمیشدیم قبرین اۆستۆنده.القرز, پادشاه نه قدر دئدیسه ائله ایلیاس دئدی:- پادشاه ساغ اوْلسۇن, یۇخۇ تۇتمۇشدۇ, قالمیشدیم قبرین اۆستۆنده.پادشاه امر ائلدی کی:- آپارین, بۇ ملۇنۇ اوْخلایین.اما اوْخ آتانلارێ اؤیرتدی کی, اوْخۇ ائله آتسینلار ایلیاسا دیمه‌سین.چۆنکی بۇ سیرلری اؤیرنمک ایستییردی.بلی, ایلیاسی اوْخا باسدیلار. اما اوْخ ایلیاسا دیمیردی, بوْینۇنۇن,قوْلتۇغۇنۇن آلتیندان کئچیردی. پادشاه گلدی, دئدی:- ایلیاس, دۆزۆن دئ گؤرۆم, گئجه هارادایدین? یوْخسا بۇ ساعت سنی آسدیرارام.ایلیاس یئنه دئدی:- پادشاه ساغ اوْلسۇن, یۇخۇ تۇتمۇشدۇ, قالمیشدیم قبرین اۆستۆنده.پادشاهین غضبی آرتدێ. حیرص بئینینه وۇردۇ, گؤردۆ کی, بۇ دئدیکلرین دئییر, امر ائلدی:- بۇ ساعت بۇنۇ آسین!بلی, ایلیاسی دار آغاجینین آلتینا گتیردیلر. کندیری بوْغازینا سالدیلار.ائله کی, ایسته‌دیلر کندیری چکسینلر, بیر ده گؤردۆلر کی, بیر آتلی چاپا-چاپاگلیر. آتلی ائله یئیین گلیردی کی, آتین اۆستۆنده‌کینی گؤرمک مۆمکۆن دئییلدی.ائله کی, دار آغاجینین آلتینا یئتیشدی, چاپا-چاپا یئره بیر نار وۇرۇب گئتدی. نار داغیلدێ.ایلیاس دئدی:- دایانین دئییم.بلی, ایلیاسین بوْینۇندان کندیری آچدیلار.ایلیاس دئدی:- پادشاه ساغ اوْلسۇن, گئدک اوْتاغا, بۇ سیرری تک سنه دئیه‌جه‌یم.پادشاهلا ایلیاس گئتدیلر اوْتاغا. ایلیاس دئدی:- پادشاه ساغ اوْلسۇن, گئجه من فیلان گؤزل قیزین یانیندا ایدیم.پادشاه دئدی:- یاخشی, اوْ پیی مسئله‌سی نه ایدی کی, سن دئدین قبۇلدۇ.ایلیاس دئدی:- پادشاه ساغ اوْلسۇن, خانیم اوْ سۇالنان دئمک ایستییردی کی, سن منی گؤرمه میسن, بیلمیرسن آریغام, کؤکم, گؤزلم, چیرکینم. اوْندا من دئدیم کی, قبۇلدۇ. یعنی هر نئجه اوْلسان, گؤزل ده, چیرکین ده, کؤک ده منه قبۇلسان. اوْندا قاپینی آچدیلار, منی ایچری بۇراخدیلار.پادشاه دئدی:- یاخشی, اوْ پوْدنوْس مسئله‌سی نه ایدی?ایلیاس دئدی:- پوْدنوْسداکی ایینه‌لری نارین اۆستۆنه وۇردۇم کی, یعنی بدنیمی بئله اوْخلاسالار, یئنه بۇ سیرری هئچ کیمه دئمه‌یه‌جه‌یم. سوْنرا کاغیذێ قایچیینان دوْغرادیم کی, بدنیمی بۇ کاغیذ کیمی دوْغراسالار دا, هئچ کیمه بۇ سیرری آچمارام. سوْنرا قۇرانی اؤپدۆم, یئره قوْیدۇم کی, آند اوْلسۇن بۇقۇرانا, هئچ کیمه هئچ نه دئمه‌رم. اوْدۇ کی, دئمیرم ده.پادشاه دئدی:- یاخشی, بس نییه سیرری آچیب ایندی دئییرسن?ایلیاس دئدی:- پادشاه ساغ اوْلسۇن, اوْ آتلی کی, کئچدی, ناری وۇردۇ یئره, نار داغیلدێ,همین قیزدێ. ناری یئره وۇردۇ, دئدی کی, بۇ سیرر منیم دئییل قوْی داغیلسین,سن اؤلمه. اوْدۇ کی, من ده دئدیم.پادشاه ایلیاسا به-به دئییب اؤز یانیندا اوْتۇرتدۇ, دئدی:- ایلیاس, آخی سن آدامی دا تانئییرسان. ایندی دی, گؤرۆم من نئجه آدامام?ایلیاس دئدی:- پادشاه ساغ اوْلسۇن, سن چؤرکچی اوْغلۇسان.پادشاه دئدی:- سن نه دانیشیرسان, من پادشاه اوْغلۇیام. منیم آتام دا بۇشهرین پادشاهی اوْلۇب, بابام دا.ایلیاس دئدی:- پادشاه ساغ اوْلسۇن, امر ائله آنان گلسین, سوْرۇش, ائله اوْلماسا بوْینۇمۇو ۇردۇر!پادشاه آناسینی چاغیردی, دئدی:- آنا, دۆزۆنۆ دی, من کیمین اوْغلۇیام؟ منیم آتام کیم اوْلۇب؟آناسی دئدی:- بالا, من سنه همله اوْلاندا آتان دئدی کی, اگر قیز دوْغسان, سنی اؤلدۆره‌جه‌یم, اوْغلان دوْغسان, نه دئسن گؤزۆم اۆسته. من دوْغان گئجه‌سی قوْنشۇدا چؤرکچی‌نین آروادێ دا دوْغدۇ. منیم قیزیم, اوْنۇن اوْغلۇ اوْلدۇ. ایشی بئله گؤرنده مامایا پۇل وئردیک, چؤرکچییه ده پۇل وئردیک, اۇشاقلارێدییشدیردیک. ایندی سن, دوْغرۇدان دا, چؤرکچی اوْغلۇسان.پادشاه ایلیاسا آفرین دئییب سوْرۇشدۇ:- ایلیاس, سن نه بیلدین کی, من چؤرکچی اوْغلۇیام?ایلیاس دئدی:- پادشاه ساغ اوْلسۇن, من اوْندان بیلدیم کی, سن اول دفعه‌ امرائلدین کی, سنین چؤریین‌دن وئرسینلر. سوْنرا دا بیر یئرده چؤرک یئدیک.تا سن منه نه پۇل, نه باشقا شئی باغیشلامادین. اوْدۇ کی, من بیلدیم سن چؤرکچی اوْغلۇسان.پادشاه دئدی:- یاخشی, ایلیاس, بس اوْ قیز کیمدی?ایلیاس دئدی:- پادشاه ساغ اوْلسۇن, اوْ قیز پادشاه قیزیدێ.پادشاه آنا‌سیندان سوْرۇشدۇ, گؤردۆ, دوْغرۇدان دا, همین قیز بۇنۇن یئرینه دییشیلن قیزدی. پادشاه سوْرۇشدۇ:- ایلیاس, بس سن کیمسن؟ایلیاس دئدی:- پادشاه ساغ اوْلسۇن, من بیر باغبان اوْغلۇیام. من اۇشاق اوْلاندابیزیم شهره هۆجۇم ائلییب باسیرلار, منی اسیر ائلییرلر, سوْنرا داگتیریب قۇل یئرینه ساتیرلار.پادشاه ایلیاسین بۆتۆن خاسیتینه فرحلندی. همین قیزی ایلیاساآلدێ, قیرخ گۆن, قیرخ گئجه توْی ائلدی, اؤز تاجینی باشیندان گؤتۆرۆب ایلیاسین باشینا قوْیدۇ, دئدی:- پادشاهلیغا سن یاراشیرسان. سنین بیلدئیین منیمکین‌دن چوْخدۇ.بۇندان سوْنرا بۇ شهرین پادشاهی ایلیاس اوْلدۇ.یئدیلر, ایچدیلر, مطلبه یئتیشدیلر. گؤیدن اۆچ آلما دۆشدۆ. بیری منیم, بیری ناغیل دئیه‌نین, بیری ده اؤزۆمۆن. سن یۆز یاشا, من ایکی اللی.هانسی چوْخدۇ سن گؤتۆر! سن ساغ, من سلامات